पिंपरी, दि. ५ जानेवारी २०२६ (देवा भालके
)
राष्ट्रवादी काँग्रेस पक्षाच्या पिंपरी गाव प्रभाग क्रमांक २१ मधील उमेदवार माजी नगरसेवक संदीप वाघेरे, डब्बू आसवानी, प्रियंका कुदळे व निकिता कदम यांच्या प्रचारार्थ उपमुख्यमंत्री अजित पवार यांची मंगळवारी पिंपरी गावात जाहीर सभा आयोजित करण्यात आली आहे. अशी माहिती माजी नगरसेवक संदीप वाघेरे यांनी दिली.
ही सभा पिंपरी गावातील श्री शिवछत्रपती स्मारक चौक येथे सायंकाळी ५ वाजता होणार आहे. नुकत्याच पिंपरी येथे झालेल्या पत्रकार परिषदेत अजित पवार यांनी सन २०१७ मध्ये महापालिकेत सत्तेवर आलेल्या भाजपवर जोरदार टीका केली होती. भाजपने महापालिकेला कर्जबाजारी केले असून पालिकेची लूट केल्याचा आरोप त्यांनी केला होता. तसेच काही मंडळींकडे आलेली प्रचंड प्रॉपर्टी कुठून आली, असा सवालही त्यांनी उपस्थित केला होता.
या पार्श्वभूमीवर मंगळवारी पिंपरी गावात होणाऱ्या जाहीर सभेत अजित पवार काय भूमिका मांडतात, याकडे राजकीय वर्तुळाचे लक्ष लागले आहे.
