- पिंपरी चिंचवड | प्रतिनिधी – देवा भालके
पिंपरी परिसरात बेकायदेशीर मटका जुगार चालवणाऱ्या अड्ड्यावर पोलिसांनी छापा टाकत सहा जणांविरुद्ध गुन्हा दाखल केला आहे. या कारवाईत रोख रक्कम व जुगाराचे साहित्य जप्त करण्यात आले आहे.
पोलिसांनी दिलेल्या माहितीनुसार, ही कारवाई ७ एप्रिल २०२६ रोजी दुपारी सुमारे १.५० वाजण्याच्या सुमारास डिलक्स चौकातील राजश्री लॉटरी सेंटरसमोरील मोकळ्या जागेत करण्यात आली.
या प्रकरणी पोलीस शिपाई शिवाजी मुंडे यांनी फिर्याद दिली आहे. आरोपी मधुकर चौधरी (वय ५२), राम दंडगुळे (वय २६), मोहम्मद मंसुरी (वय ३८), सोमनाथ शिंदे (वय ५०), लक्ष्मण रणदिवे (वय ४८) आणि विनोद एकबोटे (वय ४४) हे सहा जण विनापरवाना ‘मुंबई कल्याण’ मटका जुगार खेळवित व खेळत असल्याचे आढळून आले.
पोलिसांनी छापा टाकत आरोपींकडून ६,५०० रुपये रोख रक्कम तसेच जुगारासाठी वापरण्यात येणारे साहित्य जप्त केले. आरोपींना बीएनएसएस कलम ३५(३) अन्वये नोटीस बजावण्यात आली आहे.
या प्रकरणी मुंबई जुगार कायदा कलम १२ (अ) नुसार गुन्हा दाखल करण्यात आला असून पुढील तपास पोलीस नाईक कुडके यांच्या मार्गदर्शनाखाली सुरू आहे.या कारवाईमुळे पिंपरी परिसरातील बेकायदेशीर जुगार व्यवसायावर आळा बसण्यास मदत होणार असल्याचे पोलिसांकडून सांगण्यात आले आहे.
