पिंपरी : प्रतिनिधी देवा भालके:पिंपरी पोलीस ठाण्यात दाखल असलेल्या अल्पवयीन मुलीवरील लैंगिक अत्याचाराच्या गंभीर प्रकरणात पिंपरी-चिंचवड जिल्हा सत्र न्यायालयाने आरोपीला २० वर्षांची सक्तमजुरीची शिक्षा सुनावली आहे. तसेच आरोपीला ५० हजार रुपयांचा दंड ठोठावण्यात आला असून, दंड न भरल्यास अतिरिक्त एक वर्षाची सक्तमजुरी भोगावी लागणार आहे.
पोलिसांनी दिलेल्या माहितीनुसार, या प्रकरणी पिंपरी पोलीस ठाणे गुन्हा रजिस्टर क्रमांक ८९४/२०१९ अन्वये भारतीय दंड संहिता कलम ३७६ तसेच POCSO Act मधील कलम ३, ४, ५ आणि ६ अंतर्गत गुन्हा दाखल करण्यात आला होता.
या प्रकरणातील आरोपी हेमंत कृष्णा तांडेल (वय ३५) याच्याविरुद्ध पोलिसांनी तपास पूर्ण करून न्यायालयात दोषारोपपत्र दाखल केले होते. या प्रकरणाचा तपास सहाय्यक पोलीस निरीक्षक हरिदास बोचरे यांनी केला.
२१ सप्टेंबर २०२६ रोजी पिंपरी-चिंचवड जिल्हा सत्र न्यायालयातील मा. एस. एस. नायर, अतिरिक्त जिल्हा व सत्र न्यायाधीश यांच्या न्यायालयात या प्रकरणाचा निकाल लागला. न्यायालयाने उपलब्ध पुरावे आणि साक्षींच्या आधारे आरोपीला दोषी ठरवत २० वर्षांची सक्तमजुरी आणि ५० हजार रुपये दंड अशी शिक्षा सुनावली.
या प्रकरणात विशेष सरकारी अभियोक्ता स्मिता मुकुंद चौगुले यांनी सरकारच्या वतीने बाजू मांडली. न्यायालयीन कामकाजासाठी GPSI दीपक गायकवाड यांनी कोर्ट पैरवी अधिकारी म्हणून काम पाहिले, तर ASI राजेंद्र उंबरे आणि पोलीस कॉन्स्टेबल इसाक शेख यांनी कोर्ट ड्युटी अंमलदार म्हणून जबाबदारी पार पाडली.
ही कारवाई वरिष्ठ पोलीस निरीक्षक रूपाली बोबडे आणि पोलीस निरीक्षक (गुन्हे) विजय कुमार शिंदे यांच्या मार्गदर्शनाखाली करण्यात आली.
अल्पवयीन मुलांवरील लैंगिक अत्याचाराच्या प्रकरणांमध्ये कठोर कायदेशीर कारवाई करून दोषींना शिक्षा मिळवून देण्याच्या दृष्टीने या निकालाकडे पाहिले जात आहे.
