पिंपरी-चिंचवड (प्रतिनिधी देवा भालके) –
पिंपरी-चिंचवड महानगरपालिकेमध्ये भारतीय जनता पक्षाच्या माध्यमातून स्वीकृत नगरसेवक पदावर जुन्या कार्यकर्त्यांना संधी देण्यात यावी, या मागणीसाठी कार्यकर्त्यांनी आता आक्रमक भूमिका घेतली आहे. या पार्श्वभूमीवर मुख्यमंत्री देवेंद्र फडणवीस यांची मंत्रालय व ‘वर्षा’ निवासस्थानी भेट घेऊन त्यांना ‘घंटा भेट’ देण्याचा निर्णय घेण्यात आला आहे.
दि. १३ एप्रिल २०२६ रोजी ही सदिच्छा भेट होणार असून, यावेळी जुन्या कार्यकर्त्यांच्या भावना मुख्यमंत्री यांच्यापर्यंत पोहोचविण्यात येणार आहेत. पक्षासाठी अनेक वर्षे काम करणाऱ्या निष्ठावंत कार्यकर्त्यांना स्वीकृत नगरसेवक पदांवर संधी मिळत नसल्याची खंत व्यक्त केली जात आहे.
शहरातील विविध नागरी समस्या सोडविण्यासाठी भाजपच्या माध्यमातून अनेक आंदोलने व मोर्चे काढण्यात आले. या आंदोलनांदरम्यान अनेक कार्यकर्त्यांवर पोलिस ठाण्यांमध्ये गुन्हेही दाखल झाले. तरीदेखील त्यांना अपेक्षित न्याय मिळत नसल्याची भावना कार्यकर्त्यांमध्ये निर्माण झाली आहे.
प्रभाग क्रमांक १३ मध्ये २०१७ पासून भाजपची ताकद वाढविण्यासाठी मोठे प्रयत्न करण्यात आले. आगामी निवडणुकांमध्ये अधिकाधिक नगरसेवक निवडून आणण्यासाठी कार्यकर्त्यांनी परिश्रम घेतले; मात्र तरीही स्वीकृत नगरसेवक पदांवर त्यांची नियुक्ती करण्यात येत नसल्याचा आरोप करण्यात येत आहे.
दरम्यान, राष्ट्रवादी काँग्रेसच्या विविध गटांमध्ये नवीन कार्यकर्त्यांना संधी दिली जात असल्याचा मुद्दा उपस्थित करत, भाजपमधील जुन्या कार्यकर्त्यांकडे दुर्लक्ष होत असल्याची टीका करण्यात आली आहे. शहराध्यक्ष, आमदार आणि पदाधिकाऱ्यांनीही जुन्या कार्यकर्त्यांकडे दुर्लक्ष केल्याचा आरोप करण्यात आला आहे.
या पार्श्वभूमीवर मुख्यमंत्री देवेंद्र फडणवीस यांना ‘घंटा भेट’ देत न्यायाची मागणी करण्यात येणार असल्याची माहिती भाजप कार्यकर्ते सचिन काळभोर यांनी दिली.
