पिंपरी-चिंचवड: देवा भालके:दापोडी परिसरातील ‘ग्रीन पार्क’ या गृहनिर्माण प्रकल्पात २०१९ साली लाखो रुपये गुंतवून फ्लॅट खरेदी केलेल्या नागरिकांना अद्यापही घरे मिळाली नसल्याने तीव्र नाराजी व्यक्त होत आहे. गेल्या पाच वर्षांपासून प्रकल्प रखडल्यामुळे आज प्रकल्पातील गुंतवणूकदार नागरिक एकत्र येत बांधकाम व्यावसायिकांच्या घरी जाऊन जाब विचारला.
“आम्ही २०१९ मध्ये पैसे भरले, कोविड काळातही सहकार्य केले. मात्र आजपर्यंत फ्लॅट मिळाले नाहीत. आमचे घर आम्हाला नेमके कधी मिळणार?” असा सवाल घरखरेदीदारांनी उपस्थित केला. अनेकांनी आपली आर्थिक अडचण आणि वाढलेला ताण याबाबतही भावना व्यक्त केल्या.
यावेळी बांधकाम व्यावसायिकांनी आपली बाजू मांडताना सांगितले की, काही ग्राहकांनी अद्याप पूर्ण पैसे भरलेले नाहीत. उर्वरित रक्कम भरण्याचे आवाहन संबंधितांना करण्यात येणार असून, प्रकल्प पूर्ण करण्याचे काम सुरू आहे. डिसेंबर २०२६ पर्यंत सर्व फ्लॅट्स ताब्यात देण्याचा प्रयत्न करण्यात येईल, असे आश्वासन त्यांनी दिले.
दरम्यान, घरखरेदीदारांनी दिलेल्या आश्वासनाची पूर्तता न झाल्यास पुढील काळात कायदेशीर कारवाईचा इशारा दिला आहे. या प्रकरणाकडे आता स्थानिक प्रशासन आणि संबंधित यंत्रणांनी लक्ष देण्याची मागणी नागरिकांकडून होत आहे.
