पिंपरी चिंचवड प्रतिनिधी देवा भालके : पिंपरी-चिंचवड परिसरात वाढत्या सोनसाखळी चोरीच्या घटनांना आळा घालण्यासाठी हिंजवडी पोलीस ठाण्याच्या गुन्हे शोध पथकाने मोठी कारवाई करत एका सराईत गुन्हेगाराला अटक केली आहे. या कारवाईमुळे पहाटे मॉर्निंग वॉकला जाणाऱ्या महिलांमध्ये निर्माण झालेली भीती काही प्रमाणात कमी झाली आहे.
७ मार्च २०२६ रोजी पहाटे सुमारे ६ वाजण्याच्या सुमारास, एक महिला मॉर्निंग वॉकसाठी गेली असताना दुचाकीवरून आलेल्या दोन अज्ञात इसमांनी त्यांच्या गळ्यातील सोन्याचे मिनी गंठण जबरदस्तीने हिसकावले. यावेळी महिलेला ढकलून दिल्याने त्या जखमी झाल्या. या प्रकरणी हिंजवडी पोलीस ठाण्यात भारतीय न्याय संहिता कलम ३०९ (६) अन्वये गुन्हा दाखल करण्यात आला होता.
वरिष्ठ पोलीस निरीक्षक बालाजी पांढरे यांच्या मार्गदर्शनाखाली तपास पथकाने घटनास्थळ व परिसरातील १०० हून अधिक सीसीटीव्ही फुटेजची तपासणी केली. तांत्रिक विश्लेषणाच्या आधारे पोलिसांनी ओमकार राजेश बनसोडे (वय २३, रा. मांजरी, पुणे) याला अटक केली.
चौकशीदरम्यान आरोपीने त्याचा साथीदार विशाल विलास काळे याच्या मदतीने गुन्हा केल्याची कबुली दिली. पोलिसांनी आरोपीकडून सुमारे दोन तोळे वजनाचे सोन्याचे मिनी गंठण जप्त केले आहे.
दरम्यान, आरोपीने अशाच प्रकारे पहाटे फिरणाऱ्या महिलांना लक्ष्य करून आणखी काही चोरी केल्याचेही कबूल केले असून, या टोळीचे आणखी गुन्हे उघडकीस येण्याची शक्यता वर्तवण्यात येत आहे. या प्रकरणाचा पुढील तपास सहाय्यक पोलीस निरीक्षक सोमनाथ पांचाळ करत आहेत.
ही कारवाई पोलीस आयुक्त विनयकुमार चौबे, सह पोलीस आयुक्त डॉ. शशीकांत महावरकर यांच्या मार्गदर्शनाखाली पार पडली. तपास पथकातील अधिकाऱ्यांचे याबाबत कौतुक करण्यात येत आहे.
