पिंपरी-चिंचवड देवा भालके: शहरात ‘बुद्ध लेण्या मुक्ती आंदोलन समिती’ आणि विविध सामाजिक संस्थांच्या संयुक्त विद्यमाने ‘प्रियदर्शी चक्रवर्ती सम्राट अशोक जयंती महोत्सव २०२६’ मोठ्या उत्साहात साजरा करण्यात येणार आहे. यंदा या महोत्सवाचे पाचवे वर्ष असून, गुरुवार दि. २६ मार्च २०२६ रोजी ऐतिहासिक भीमसृष्टी येथे विविध कार्यक्रमांचे आयोजन करण्यात आले आहे.
जगातील महान शासनकर्ते म्हणून ओळखले जाणारे सम्राट अशोक यांनी बुद्ध धम्माचा प्रसार जागतिक स्तरावर केला. त्यांच्या कार्याचा वारसा नव्या पिढीपर्यंत पोहोचावा, या उद्देशाने या महोत्सवाचे आयोजन करण्यात आले असल्याची माहिती आयोजकांनी दिली.
कार्यक्रमाची सुरुवात सकाळी १० वाजता सम्राट अशोक आणि भारतरत्न डॉ. बाबासाहेब आंबेडकर यांच्या पुतळ्यांना पुष्पहार अर्पण करून होणार आहे. त्यानंतर सकाळी १०:१५ वाजता पंचशील ध्वजारोहण व बुद्ध वंदना पार पडेल.
सायंकाळी ५ ते ७ या वेळेत सम्राट अशोक यांच्या प्रतिमेची भव्य मिरवणूक काढण्यात येणार असून, ‘दिया स्ट्रीट डान्स ग्रुप’ हे या मिरवणुकीचे प्रमुख आकर्षण असणार आहे. रात्री ७ ते ८ या वेळेत ‘प्रियदर्शी चक्रवर्ती सम्राट अशोक आणि बुद्ध धम्म’ या विषयावर प्रा. प्रकाश पवार (फर्ग्युसन महाविद्यालय, पुणे) यांचे व्याख्यान आयोजित करण्यात आले आहे. त्यानंतर रात्री ८ ते १० या वेळेत प्रसिद्ध गायक कुणाल वराळे व त्यांच्या संचाकडून ‘गाथा युगपुरुषांची’ हा संगीतमय कार्यक्रम सादर होणार आहे.
या महोत्सवाचे अध्यक्षपद बौद्ध समाज विकास महासंघाचे अध्यक्ष भाऊसाहेब डोळस भूषविणार असून, स्वागताध्यक्ष म्हणून राजू भालेराव उपस्थित राहणार आहेत. कार्यक्रमाचे सूत्रसंचालन नामदेव वाळके करणार आहेत.
भारत रत्न डॉ. बाबासाहेब आंबेडकर स्मारक, ऐतिहासिक भीमसृष्टी येथे होणाऱ्या या महोत्सवाला नागरिकांनी मोठ्या संख्येने उपस्थित राहावे, असे आवाहन संयोजकांतर्फे करण्यात आले आहे.
